Yfir tíu þúsund kennarar tóku þátt í mótmælum í höfuðborg Lettlands, Riga, í dag, en þeir mótmæla væntanlegri lækkun launa í landinu. Stjórnvöld í Lettlandi stefna að því að lækka laun opinberra starfsmanna til þess að draga úr kostnaði hins opinbera. 

Mótmælendur báru mótmælaspjöld með ýmsum slagorðum. Þar á meðal. „Þið glímið við kreppu en við erum fátæk." „Verðum við að flytja úr landi."

Mótmælin fóru friðsamlega fram en í janúar, þegar svipuð mótmæli fóru fram, brutust út átök á milli mótmælenda og lögreglu. 

Efnahagsástandið er slæmt í Lettlandi og hefur landið fengið vilyrði fyrir 7,5 milljarða evru láni frá Alþjóða gjaldeyrissjóðnum. Til þess að fá lánið verða stjórnvöld að sýna fram á að fjárlagahallinn nemi ekki meira en 5% af vergri landsframleiðslu. Til þess að svo geti verið þurfa stjórnvöld að samþykkja ný fjárlög og grípa þarf til ýmissa óvinsælla aðgerða, svo sem lækkun launa. Gert er ráð fyrir því að fjárlögin verði rædd á þjóðþingi landsins í júní.

Kennari sem AFP fréttastofan ræddi við í mótmælunum segir að staðan sé afar erfið og fjölmargir berist í bökkum. Mikið atvinnuleysi sé í landinu en eiginmaður hennar sé atvinnulaus. Eftir að hafa kennt í 22 ár eru mánaðarlaun hennar 350 lats, sem svarar til 79 þúsund íslenskra króna. Óttast kennarar í Lettlandi að laun þeirra verði lækkuð um 20% síðar á árinu.