Barack Obama Bandaríkjaforseti er hann ávarpaði tyrkneska þingið í dag. Reuters

Barack Obama Bandaríkjaforseti lýsti því yfir í morgun að Bandaríkin muni aldrei heyja stríð við íslam. Þá hvatti hann til aukinna og bættra samskipta múslímaríkja og Vesturlanda er hann ávarpaði tyrkneska þingið í morgun.

„Ég ætla að segja þetta eins skýrt og ég get. Bandaríkin eru ekki og munu aldrei verða í stríði við Íslam. Bandalag okkar við múslímaheiminn skiptir í raun sköpum, við það að halda aftur af öfgahugmyndum sem fólk af öllum trúarbrögðum hafnar” sagði hann. Hann sagði samskipti þessara menningarheima þó ekki mega einskorðast við baráttuna gegn öfgamönnum. 

„Samskipti Bandaríkjanna við múslímaríkin mega þó ekki og munu ekki eingöngu byggja á andstöðunni við al Qaida. Við sækjumst eftir margþættu sambandi sem byggir á sameiginlegum hagsmunum og gagnkvæmri virðingu," sagði hann.

„Við viljum koma því á framfæri  hversu mikils við metum íslamska trú, sem öldum saman hefur lagt svo mikið að mörkum til þess að bæta heiminn, að heimalandi mínu meðtöldu.”  

Obama átti fund með Abdullah Gul, forseta Tyrklands, í morgun og var að fundinum loknum spurður um afstöðu sína til fjöldamorða Tyrkja á Armenum á tímum fyrri heimsstyrjaldarinnar.

Obama, sem hefur áður lýst því yfir að hann telji að um þjóðarmorð hafi verið að ræða, neitaði að svara því beint hvort hann liti enn svo á en hvatti Tyrki og Armena til að gera upp fortíðina á heiðarlegan og uppbyggilegan hátt.

Talið er að tyrkneskir hermenn hafi drepið allt að 1,5 milljónir Armena á tímum fyrri heimsstyrjaldarinnar. Þeir viðurkenna að drápin hafi átt sér stað en neita að skilgreina þau sem þjóðarmorð líkt og Armenar vilja gera.