Jacqui Smith innaanríkisráðherra Bretlands. Reuters

Jacqui Smith, innanríkisráðherra Bretlands, segist ekki hafa íhugað að segja af sér vegna klámmynda sem eiginmaður hennar og skrifstofustjóri rukkaði embætti hennar fyrir. Þetta kemur fram á fréttavef Sky.

Smith segir í viðtali við Sky að málið hafi verið mjög vandræðalegt, rangt og að um mistök hafi verið að ræða en eiginmaður hennar Richard Timney, keypti aðgang að myndunum tveimur á heimili þeirra er hún var ekki heima.  Hann sendi síðan reikning fyrir þeim með reikningum vegna reksturs skrifstofu hennar.

„Ég hef sagt að mér þyki þetta leiðinlegt en ég tók þá ákvörðun að halda áfram í starfi,” segir hún í viðtalinu.

Fjármál Smith hafa verið mjög til umræði í breskum fjölmiðlum eftir að uppvíst varð um málið og hefur m.a. verið greint frá því að hún hafi þegið 150.000sterlingspunda styrk vegna viðhalds á heimil sínu í Redditch.

Auk þess þiggur hún styrk til heimilishalds í London en þar er hún skráð til heimilis hjá systur sinni.Smith segir í viðtalinu að þær upplýsingar sem birtar hafi verið um kostnað vegna heimilishalds hennar séu ekki allar kostar réttar og hvetur til þess að húsnæðiskostnaður allra ráðherra verði gerður opinber.

Hún neitar hins vegar að greina nánar frá eigin kostnaði og segist ekki sjá neitt athugunarvert við það að ráðamenn fái greiddan húsnæðiskostnað.

„Ég lít ekki svo á að það sé neitt rangt við það. Ef við viljum að fólk, sem ekki á fyrir tvö heimili, taki við ráðherraembættum, verðum við að gera fólki það kleift,” segir hún

„Það sem ég hef farið fram á að fá greitt er hóflegur kostnaður sem tengist því að búa á tveimur stöðum. Ég tel sanngjarnt að ég fái hann greiddan.”

 Þá segir hún rangt að hún hafi krafið ríkið um ofreiknaðan kostnað vegna reksturs heimilis systur sinnar: „Ég bý með systur minni. Við deilum húsi  og kostnaðinum við það. Við borðum saman og búum saman í húsinu. Þetta er eitt af því sem hefur verið rangtúlkað. Ég er ekki bara með kassa uppi á háalofti," segir hún. 

Geoff Hoon, flutningamálaráðherra Bretlands, og  Alistair Darling fjármálaráðherra sæta nú einnig gagnrýni vegna risnukostnaðar og annarra opinberra útgjalda og hefur Gordon Brown forsætisráðherra Bretlands falið siðanefnd þingsins að fara yfir útgjöld opinberra starfsmanna í tengslum við mál ráðherranna.