Frá Taílandi í morgun Reuters

Stjórnvöld í Taílandi ætla að tryggja öryggi á helstu flugvöllum og höfnum landsins, að sögn talsmanns ríkisstjórnarinnar en stjórnvöld reyna nú að brjóta á bak aftur uppreisn stjórnarandstæðinga. Segir hann að á næstu klukkustundum verði gripið til aðgerða til þess að tryggja öryggi innviða taílensks þjóðfélags. Talsmaðurinn, Panitan Wattanayagorn, segir alvanalegt að gripið sé til aðgerða þegar neyðarástandi hefur verið lýst yfir en öryggisgæsla hefur verið aukin til muna á flugvöllum og höfnum.  Stjórnvöld í Taílandi lýstu yfir neyðarástandi í gær í Bankok og nágrenni borgarinnar þar sem þúsundir mótmælenda hafa krafist afsagnar forsætisráðherranns, Abhisit Vejjajiva. Eru það einkum stuðningsmenn Thaksin Shinawatra, fyrrverandi forsætisráðherra landsins, sem hafa staðið fyrir mótmælunum. Thaksin, sem er í útlegð hefur boðað að hann muni jafnvel snúa aftur heim til þess að stýra byltingu stjórnarandstæðinga. Thaksin var á síðasta ári dæmdur í tveggja ára fangelsi fyrir spillingu en honum var steypt af stóli í valdaráni hersins fyrir rúmum tveimur árum.

Abhisit Vejjajiva, sem áður var einn leiðtoga stjórnarandstöðunnar í Taílandi var í desember kjörinn forsætisráðherra landsins, sá fimmti á tveimur árum. Abhisit er yngsti forsætisráðherrann í sögu landsins. Hann er 44 ára, fæddist í Bretlandi og er með MA-próf í hagfræði frá Oxford-háskóla. Að sögn fréttaskýranda BBC er Abhisit óflekkaður af spillingu og hagsmunaárekstrum, sem sé fáheyrt í taílenskum stjórnmálum, þótt hann hafi setið á þingi í 16 ár.

„Við viljum upplýsa ykkur um að ókyrrðin í Taílandi er að baki og stjórnvöld hafa hemil á ástandinu, sagði Panitan í sjónvarpsávarpi í morgun á sama tíma og hermenn brutu niður mótmæli í höfuðborginni.

Samkvæmt upplýsingum frá flugvallaryfirvöldum í Bankok hefur lögreglu verið fjölgað á vallarsvæðinu og öryggisráðstafanir auknar. Engar tafir eru á flugi til og frá landinu í gegnum Bankok. Á síðasta ári brutust út mótmæli á flugvellinum í Bankok og lá allt millilandaflug niðri um hann í níu daga á þeim tíma.

Samkvæmt upplýsingum frá fréttaritara BBC í Bankok taka um fimm hundruð hermenn þátt í aðgerðum gegn mótlendum í borginni. Hafa þeir reynt að opna helstu leiðir um borgina með því að reka mótmælendur í burtu með góðu og illu. Hafa mótmælendur svarað með því að kasta bensínsprengjum og ekið strætisvögnum á hermenn sem hafa raðað sér upp.

Tugir hafa særst í átökunum í morgun en ekki liggur nákvæmlega fyrir hve margir þeir eru. Þúsundir mótmælenda eru fyrir utan þinghúsið og neita að að yfirgefa svæðið fyrr en Abhisit segir af sér. Hann hefur hins vegar beðið þjóðina að taka ástandi mála með ró og segir að stjórnvöld hafi stjórn á ástandinu.