Ujjwal Nikam saksóknari ræðir við fréttamenn voð Arthur Road fangelsið í Mumbai Reuters

Maður sem sagður er vera eini eftirlifandi tilræðismaðurinn í hryðjuverkunum í Mumbai á Indlandi dró játningu sína í málinu til bakavið upphaf réttarhaldanna yfir honum í morgun. Segir lögfræðingur hans hann hafa verið beittan harðræði til að þvinga fram játninguna. Þetta kemur fram á fréttavef BBC. 

Réttarhöld í málinu hófust í morgun, eftir nokkurra daga tafir, en Qasab er ákærður fyrir morð á 166 einstaklingum og árás á Indland. Hann á dauðadóm yfir höfði sér verði hann fundin sekur.  

Við upphaf réttarhaldanna las Ujwal Nikam, saksóknari í málinu, upp hluta játningar hans. Þá sagði hann tilræðin hafa verið hugsuð sem árás Pakistana á Indland.   

Maðurinn, Mohammed Ajmal Amir Qasab, er frá Pakistan og hefur aðild hans að málinu skapað mikla spennu í samskiptum Indlands og Pakistan. 

Nikam sagði m.a. í opnunarræðu sinni að jafnvel þótt Qasab hafi ekki verið viðstaddur er til skotbardaga kom á hótelunum Taj og  Trident og í Nariman menningarmiðstöðinni geti hann talist ábyrgur fyrir gerðum samverkamanna sinna. Þá sagði hann tilræðismennina hafa notið aðstoðar leyniþjónustumanna og að háttsettur hershöfðingi hanfi verið viðstaddur þjálfun þeirra. Hann nefndi hins vegar Pakistan aldrei í ræðu sinni.

Abbas Kazmi, nýr lögfræðingur Qasab, lagði í morgun fram umsókn um að réttað yrði yfir honum fyrir ungmennadómstól en því var hafnað. Þá lagði hann fram kröfu um að játning hans verði dregin til baka sem sönnunargagn. Dómari hefur ekki enn úrskurðað í því máli.

Fyrri lögfræðingur Qasab var rekinn á miðvikudag eftir að fréttist að hann væri einnig lögfræðingur eins af fórnarlömbum árásarmannanna.