Sjóræningjar og gíslar með hendur á lofti eftir að hafa gefist upp fyrir hollenskum sjóliðum. Reuters

Hersveitir NATO hrundu í gærkvöldi árás sómalskra sjóræningja á norskt tankskip á Adenflóa. Herskip veittu ræningjunum síðan eftirför og handtók sjö þeirra. Ræningjunum var sleppt aftur eftir yfirheyrslur.  

Talsmaður um borð í kanadíska herskipinu Winnipeg sagði við Reutersfréttastofuna, að ræningjar hefðu ráðist á norska skipið Front Ardenne vopnaðir rifflum og handsprengjum. Kanadíska herskipið skarst í leikinn og ræningjarnir flúðu þá á báti eftir að hafa kastað vopnum sínum frá sér. Kanadíska herskipið elti sjóræningjabátinn í myrkrinu og náði honum á endanum.

Í gær frelsuðu hollenskir sjóliðar 20 Jemena, sem voru í gíslingu sjóræningja. Sómalskir sjóræningjar rændu jafnframt belgísku skipi með 10 manna áhöfn.