Þýskur lögreglumaður skýtur gyðingakonu og dóttur hennar til bana í úkraínska bænum Ivangorod.

Nýjar rannsóknir sagnfræðinga hafa afhjúpað hrottalegar aðferðir nasista við aftökur á gyðingum í síðari heimsstyrjöldinni. Rannsóknirnar rifja upp að hryllingurinn var ekki einangraður við útrýmingarbúðirnar. Viðkvæmir eru varaðir við þessari frásögn.

Sagnfræðingar við Yad Vashem helfararsafnið í Jerúsalem hafa þannig sett saman skýrari mynd af hryllingnum í Úkraínu.

Beinast sjónir þeirra að bænum Berdichev þar sem gyðingakonur voru látnar synda yfir breiða á þar til kraftar þeirra þrutu og þær drukknuðu.

Í bænum Telsiai í Litháen var börnum gyðinga varpað lifandi í grafir þar sem fyrir lágu látnir foreldrar þeirra.

Í Liozno í Hvíta-Rússlandi var gyðingum smalað saman í læsta hlöðu þar til margir þeirra frusu í hel.  

Lea Prais, stjórnandi rannsóknarinnar, víkur að gyðingaofsóknum í Sovétríkjunum með þeim orðum að gyðingar þar hafi minnst fórnarlambanna með virkari hætti en áður var talið.

Gestir sýningarinnar geta séð dagbókarbrot þýsks hermanns sem kveðst hafa verið einn 15 hermanna með „sterkar taugar“ sem valdir voru til að myrða alla íbúa bæjarins Krupki í Hvíta-Rússlandi með tölu.

„Börnin héldu í mæður sínar, konur stóðu við hlið eiginmanna sinna. Ég mun ekki gleyma þessari sjón strax,“ skrifar hermaðurinn um fjöldaaftökur á íbúum bæjarins.

Á þessari vefsíðu má fræðast nánar um rannsóknina.