Sjóræningjar náðu á sitt vald fyrsta belgíska flutningaskipinu um helgina. Þeir tóku MV Pompei á laugardag ásamt tíu manna áhöfn og sigla því í átt að strönd Sómalíu. Reuters

Sómalskir sjóræningjar hafa sleppt flutningaskipinu MV Sea Horse sem þeir náðu á sitt vald 14. apríl síðastliðinn. Líbanskur eigandi skipsins greiddi sjóræningjunum um 100 þúsund dollara lausnargjald eða sem nemur tæpum 13 milljónum íslenskra króna.

Sea Horse er um 5000 brúttórúmlestir að stærð og siglir undir fána Tógó. Skipið var á leið til Mumbai á Indlandi til að sækja hjálpargögn fyrir Sómalíu þegar vopnaðir sjóræningjar náðu því á sitt vald. Talið er að um helmingur Sómala eða nálægt þremur milljónum manna, sé í brýnni þörf fyrir matargjafir og aðrar nauðsynjar.

Viðræður um lausn skipsins hafa staðið allt frá því sjóræningjar náðu því á sitt vald en samkomulag náðist um helgina.

Nítján erlend skip með rúmlega 300 manns eru enn á valdi sómalskra sjóræningja. Herskip og þyrlur frá aðildarþjóðum NATO náðu að hrinda tveimur árásum sjóræningja á flutningaskip á Aden flóa um helgina. Annars vegar var reynt að ráðast á norskt olíuflutningaskip og hins vegar skip frá Yemen.

Um 20 herskip NATO þjóða eru á Aden flóa. Engu að síður náðu sjóræningjar á sitt vald fyrsta belgíska flutningaskipinu um helgina. Þeir tóku MV Pompei á laugardag ásamt tíu manna áhöfn og sigla því nú í átt að strönd Sómalíu.

Stjórnvöld í Sómalíu sögðu um helgina að sjóræningjar ættu yfir höfði sér dauðarefsingu. Erlend skipafélög reiddu fram rúmlega 80 milljónir í lausnargjald fyrir skip sem sjóræningjar tóku eða rúmlega 10 milljarða íslenskra króna.