A.m.k. 48 manns, þar á meðal nokkrir íranskir pílagrímar, létu lífið í sjálfsmorðssprengingu á veitingastað í borginni Baquba í Írak í dag. Þá létust 28 manns hið minnsta vegna sjálfsmorðssprengingar í Baghdad, þar sem lögregla var að útdeila hjálpargögnum til heimilislausra fjölskyldna. 

Eftir er að staðfesta endanlega tölu látinna og særðra í Babuqa, en líklegt þykir að þetta sé mannskæðasta árás í landinu það sem af er þessu ári. Á sama tíma berast fréttir þess efnis að írösk yfirvöld hafi handtekið Abu Omar al-Baghdadi, sem sagður er vera leiðtogi al-Quaeda í Írak. Talsmaður varnarmálaráðuneytisins segist hinsvegar „ekki vera viss“ hvort sá handtekni sé í raun al-Baghdadi.

Aðalráðgjafi bandaríska varnarmálaráðuneytisins sagðist í gær telja að árásum uppreisnarmanna myndi líklega fjölga þegar Bandarískar hersveitir tækju að yfirgefa landið. Barack Obama hefur gefið það út að í ágúst á næsta ári verði aðeins 35 - 50 þúsund bandarískir hermenn eftir í Írak og að fyrir árslok 2011 hafi allar hersveitir yfirgefið landið.