Mexíkósk yfirvöld ráðleggja fólki að klæðast andlitsgrímum til að verjast smiti. Reuters

Bandarísk yfirvöld hafa lýst yfir neyðarástandi vegna útbreiðslu svínaflensu en 20 tilvik hafa verið staðfest í Bandaríkjunum. Fólk sem kemur frá löndum þar sem flensan hefur greinst verður meðhöndlað sérstaklega. Tilkynnt hefur verið að átta nemendur frá New York séu meðal sýktra. Þá hafa sjö tilfelli fundist í Kaliforníu, tvö í Texas, tvö í Kansas og eitt í Ohio.

Yfirlýsing um neyðarástand veitir heilbrigðisyfirvöldum leyfi til að nota lyf og greiningaraðferðir sem þau annars gætu ekki notað, sérstaklega í tilfelli mjög ungra barna. Ferðamenn sem sýna einkenni sýkingar verða settir í einangrun samkvæmt viðeigandi reglum.

Að sögn mexíkóskra yfirvalda hefur 71 látist af völdum flensunnar en ekki er vitað hversu margir eru smitaðir. Þarlend yfirvöld hafa einnig gripið til aðgerða til að hefta útbreiðslu svínaflensunnar en þau hafa legið undir gagnrýni fyrir að bregðast seint við.

Tíu nemendur á Nýja sjálandi hafa greinst með inflúensu A, sem er vísbending um að þeir gætu hafa sýkst af svínaflensunni. Nemendurnir  voru nýlega á ferðinni í Mexíkó.

Talsmenn Alþjóðaheilbrigðisstofnunarinnar (WHO) segja svínaflensuna vera neyðartilfelli á alþjóðamælikvarða og að lönd verði að taka þátt í auknu eftirliti vegna hennar.

Þá hafa óstaðfest tilfelli fundist í Frakklandi, Spáni og Ísrael, meðal fólks sem nýlega var á ferð í Mexíkó.