Flugvélarnar flugu m.a. yfir Frelsisstyttuna. AP

Fólk þusti út úr skrifstofubyggingum á Manhattan í dag þegar Boeing 747 þota forseta Bandaríkjanna flaug lágt yfir suðurenda Manhattan og Hudson-ána í New York. Flug risaþotunnar vakti ugg um að atburðir 11. september 2001 væru að endurtaka sig. Hvíta húsið hefur nú beðist afsökunar á fluginu.

Þotan flaug í fylgd lágfleygra orrustuþotna með tilheyrandi þotugný í um hálftíma í námunda við Manhattan. Embættismenn útskýrðu flugið svo að það hafi verið vegna ljósmyndatöku. Forsetinn var ekki um borð í flugvélinni.

Hvíta húsið gaf út afsökunarbeiðni í dag vegna flugsins. Louis Caldera, yfirmaður herskrifstofu Hvíta hússins, sagði í yfirlýsingu vegna ljósmyndaflugsins að að þrátt fyrir að yfirvöld alríkisins hafi gert yfirvöldum ríkisins og New York borgar og New Jersey viðvart eftir eðlilegum leiðum sé ljóst að leiðangurinn hafi valdið ringulreið og truflun.

Michael Bloomberg, borgarstjóri New York, sagði að hann hafi ekki verið látinn vita að flugið stæði til og kallaði skort á upplýsingagjöf „fáránlega og bera vott um dómgreindarskort“.

Skelfingu lostið skrifstofufólk sem áttaði sig ekki á merkingum á forsetaflugvélinni óttaðist að atburðir 11. september 2001 væru að endurtaka sig. Sem kunnugt er flugu tvær farþegaþotur þá á tvíburaturnana og létust nærri þrjú þúsund manns í árásunum. 

„Ég sá að allir voru á hlaupum og ég hljóp líka út. Ég er enn með hjartslátt,“ sagði Jurgens Bauer sölumaður. Skrifstofan hans er gluggalaus svo hann sá ekki flugvélina, en sagði að skelfingin hafi verið mjög raunveruleg.

„Ég var  þarna 11. september og sá þúsundir deyja. Mér líkar ekki að vera ekki látinn vita af ljósmyndaflugi hersins,“ sagði hann.

Lögreglan staðfesti að skrifstofur hafi verið rýmdar en tilgreindi ekki hve margar. „Ég reikna með að fólk hafi  verið hrætt,“ sagði talsmaður lögreglunnar.