Rannsóknarskip í hafís.

Hækkun yfirborðs sjávar gæti orðið þrefalt meiri í lok þessarar aldar vegna bráðnunar íss en áður var talið. Þessi niðurstaða verður kynnt á ráðstefnu Norðurskautsráðsins í Tromsö, Noregi, á miðvikudag að sögn fréttavefjar norska dagblaðsins Nordlys.

Loftslagsnefnd Sameinuðu þjóðanna taldi árið 2007 að yfirborð sjávar myndi hækka um 30-35 sentimetra fyrir árið 2100. Nýjustu áætlanir sýna að um næstu aldamót gæti yfirborð hafsins hafa hækkað um einn metra. Þessar niðurstöður eru samkvæmt skýrslu sem AMAP, umhverfis- og eftirlitsstofnun norðurskautssvæðisins, mun kynna á loftslagsráðstefnunni í Kaupmannahöfn í desember. 

Á miðvikudag fá Al Gore, friðarverðlaunahafi Nobels, og utanríkisráðherrar tólf landa sem koma til Tromsö á fund Norðurskautsráðsins að heyra helstu niðurstöður skýrslunnar.

Dr. Dorthe Dahl Jensen, við Niels Bohr stofnunina, sagði í samtali við NTB fréttastofuna að loftslagsbreytingarnar séu farnar að hafa áhrif á stóra ísmassa á borð við Grænlandsjökul og íshellu Suðurskautslandsins. Þau hafi aðlagað tölur loftslagsnefndar Sþ og fengið mun hærri niðurstöðu.

Hún sagði að vísindamenn hafi verið efins um að bráðnun á Suðurskautslandinu myndi hafa áhrif til hækkunar á sjávaryfirborði. Loftslagsnefnd Sþ hafi talið 2007 að ísinn á Suðurskautslandinu myndi aukast og draga úr hækkun sjávaryfirborðs um 7 sentimetra til loka þessarar aldar. Nú bendi niðurstöður til þess að bráðnun Grænlandsjökuls og Suðurskautsíssins muni ein og sér hækka sjávaryfirborð um 15 sentimetra til ársins 2100.

Þá er bent á að bráðnun hafíssins á norðurskautssvæðinu sé mun hraðari en áður hafi verið talið. Ástandið nú sé líkt og spáð hafi verið árið 2030.