Mexíkósk mæðgin á götum Mexíkóborgar nota hlífðargrímur til þess að verjast svínaflensusmiti. DANIEL AGUILAR

Yfirvöld í Mexíkóborg hafa bannað kaffihúsum og veitingastöðum að selja mat til neyslu á sölustöðum sínum, nema viðskiptavinir taki matinn með sér. Þetta er liður í því að reyna að hindra frekari útbreiðslu svínaflensu þar í borg. Frá þessu er greint á fréttavef BBC. 

Allir skólar í gjörvallri Mexíkó eru lokaðir sem og kirkjur, takmörk sett á fundarhöld og vinsælum áfangastöðum ferðamanna hafa verið lokaðir. Jose Angel Cordova, heilbrigðisráðherra landsins segir grunur leika á að 159 manns hafi látið lífið í landinu af völdum svínaflensu, en opinberu staðfestu tölurnar lækkuðu í gær úr tuttugu í sjö. Alls er talið að tæplega 2.500 manns hafi smitast og enn dvelja um ríflega 1.300 á spítala vegna veikinda sinna. 

Fjöldi hugsanlegra smita hefur hækkað hratt á heimsvísu að undanförnu, en enn hefur enginn utan Mexíkó látið lífið vegna veirusmitsins. 

Sameinuðu þjóðirnar  hafa hvatt þjóðir heims til þess að yfirfara viðbragðsáætlanir sínar við hugsanlegum heimsfaraldri. 

Yfirvöld í Mexíkóborg segja ráðstafanir þær, sem gripið hefur verið til þar í borg í varúðarskyni, kosta fyrirtækin þar um 777 milljón pesós eða sem samsvarar sjö milljörðum á dag. 

Í gær var frá því greint að hugsanleg smit hefðu komið upp á Norðurlöndunum. Á vef danska dagblaðsins Politiken kemur í dag fram að enginn þeirra tólf Dana, sem taldir voru smitaðir, reyndust vera svo í reynd. Á sama vef er greint frá því að utanríkisráðherra Svíþjóðar hafi ráðlagt fólki frá því að ferðast til Mexíkó vegna flensunnar. Utanríkisráðherra Danmerkur vill ekki ganga jafnlangt og sænski starfsbróðir hans. 

Auk hinns sjö staðfestra tilfella Svínaflensunnar í Mexíkó hafa 64 tilfelli verið staðfest í Bandaríkjunum, 13 í Kanada, þrjú á Nýja sjálandi og tvö tilfelli í Bretlandi, á Spáni og í Ísrael. Grunur leikur á um að flensan hafi greinst í Brasilíu, Gvatemala, Perú, Ástralíu, Suður-Kóreu og sjö Evrópusambandslöndum.