Lögregla á Spáni hefur stöðvað starfsemi glæpahrings sem notaði eldri borgara sem burðardýr við smygl á kókaíni með skemmtiferðaskipum til landsins. Er þetta í fyrsta skipti sem upp kemst um kókaínsmygl til Spánar með skemmtiferðaskipum sem bjóða upp á lúxussiglingar til landsins.

Í tilkynningu frá lögreglunni kemur fram að farþegar skipanna, sem flestir eru á eftirlaunaaldri, fengu eiturlyfin afhent er skipin voru í höfn í Suður-Ameríku og komu þeim síðan í land er skipin voru í höfn á Spáni. 

Tveir eldri borgarar sem tilheyra glæpahringnum hafa verið handteknir. Um er að ræða konur sem ætluðu að afhenda kókaínið þegar þær komu í land í höfn spænsku borgarinnar Cadiz en efnin höfðu þær fengið afhent í Brasilíu. Alls fundust 27 kg af hreinu kókaín í klefum kvennanna í skemmtiferðaskipinu.

Alls hafa níu verið handteknir vegna málsins. Þar á meðal höfuðpaur glæpahringsins sem  var handtekinn er hann reyndi að flýja land til Brasilíu.