Edgar Hernandez er talinn vera fyrsta fórnarlamb svínaflensunnar í Mexíkó sem lifði veikindi sín af. Vísindamenn telja að hann geti verið mikilvægur hlekkur í því að afla frekari upplýsingar um veiruna til að skilja hana betur og hvernig hún dreifir sér. Þetta kemur fram á vef danska dagblaðsins Berlingske Tidende.

Hernandes, sem er ekki nema fjögurra ára gamall, kemur frá þorpinu La Gloria. Þorpið liggur steinsnar frá stærsta svínaframleiðanda landsins. Fyrir um mánuði byrjuðu íbúar þorpsins að kenna sér meins, fengu háan hita, beinverki og hósta. Þegar yfirvöld áttuðu sig á því að fjöldi veikra gæti ekki verið helber tilviljun hófu heilbrigðisstarfsmenn að taka sýni hjá þeim veiku. Eitt sýnanna, það sem kom frá Hernandes, reyndist jákvætt af svínaflensuveirunni. 

Starfsmenn á vegum mexíkóska stjórnvalda eru nú að skoða drenginn og vona að rannsóknirnar geti svarað lykilspurningum á borð við þær af hverju flensan hafi verið banvæn í Mexíkó en ekki öðrum löndum þar sem hún hefur greinst. Einnig á að skoða hvort hægt sé að rekja veiruna til svínanna í La Gloria.