Ferðamenn um allan heim ganga nú með andlitsgrímur til að forðast svínaflensu, eins og sjá mátti á Barcelona-flugvelli í dag. Reuters

Nú er talið að 159 hafi dáið í Mexíkó vegna svínaflensunnar en staðfest dauðsföll eru sjö. Tæplega tveggja ára mexíkóskt barn dó í Texas af völdum flensunnar og er það fyrsta dauðsfallið af hennar völdum í Bandaríkjunum. Enn bætist í hóp þeirra sem taldir eru smitaðir.

Barnið sem dó í Texas var 23 mánaða gamalt og var frá Mexíkó. Það hafði komið til Bandaríkjanna til að fá læknismeðferð. Áður en barnið dó voru 65 staðfest tilfelli svínaflensu í Bandaríkjunum. 

Mexíkó hefur farið verst af völdum svínaflensunnar. Þar eru staðfest dauðsföll af völdum veikinnar sjö talsins en talið er að 159 hafi dáið af völdum svínaflensu. Búið er að loka öllum samkomustöðum og einnig vinsælum ferðamannastöðum í Mexíkó.

Alþjóðaheilbrigðismálastofnunin WHO sagði að alls sé vitað um 64 smitaða af svínaflensu í Bandaríkjunum, 26 í Mexíkó, sex í Kanada, þrjá í Nýja Sjálandi, og í Bretlandi, Ísrael og Spáni séu tveir smitaðir í hverju landi.

Þar að auki hafa verið staðfest þrjú tilfelli í Þýskalandi og sagt að tveir séu smitaðir í Kosta Ríka. Í Austurríki mun vera eitt staðfest tilvik og 13 tilvik í Kanada. Þá hefur tilfellum í Bretlandi fjölgað í fimm og á Spáni í fjögur.

Yfirmenn landbúnaðarmála í Bandaríkjunum vilja breyta heiti sjúkdómsins því þeir segja hann gefa ranglega til kynn að fólk geti smitast við neyslu svínakjöts, en sú sé ekki raunin. 

Þá hafa Egyptar fyrirskipað tafarlausa slátrun allra svína í landinu til að forða útbreiðslu svínaflensu, að sögn heilbrigðisráðherra landsins.