Vegfarandi á Manhattan í New York gekk með grímu fyrir vitum sér í dag. Reuters

Texas ríki hefur fylgt í fótspor Kaliforníu og lýst yfir neyðarástandi vegna svínaflensu, eða 2009 H1N1 eins og bandarískir embættismenn vilja nefna sjúkdóminn. Skólum var lokað og hætt við íþróttaviðburði og leiki eftir að fyrsta dauðsfallið í Bandaríkjunum vegna veikinnar varð í ríkinu. 

Rick Perry ríkisstjóri sagði að yfirlýsingin um neyðarástand næði til alls ríkisins. Með því yrði viðbúnaður færður á hærra stig og gripið til aðgerða til að hamla útbreiðslu veirunnar.

Nú er vitað um 91 einstakling í Bandaríkjunum sem smitast hafa af veikinni. Flestir hinna smituðu eru í New York en þar munu tilfellin vera 51, í Texas eru þau 16 og 14 í Kaliforníu. 

Keiji Fukuda, aðstoðarforstjóri Alþjóðaheilbrigðismálastofnunarinnar, sagði í dag vera ljóst að veiran breiðist út. Engin merki séu um að hægi á útbreiðslunni. Hann taldi útbreiðsluna vera að þróast í átt til heimsfaraldurs. 

„Við tölum þessar upplýsingar og metum heildarstöðuna sem bendir til þess að eftir því sem útbreiðslan þróast þá færumst við nær fimmta viðbúnaðarstigi,“ sagði Fukuda. Boðað var til fundar sérfræðinga WHO um útbreiðslu svínaflensunnar í kvöld.