DANIEL AGUILAR

Tala staðfestra og grunaðra svínaflensutilfella hækkar sífellt á Nýja-Sjálandi. Nú hafa greinst 16 staðfest tilfelli þar í landi auk þess sem grunur leikur á um að rúmlega hundrað manns til viðbóta hafi sýkst af veirunni.

Allt á fólkið, sem veikst hefur, það sameiginlegt að hafa nýverið ferðast um Mexíkó og Bandaríkjunum með einni undantekningu þó. Þar er um að ræða barn einstaklingsins sem nýverið var á ferðalagi. 

„Fjöldi grunaðra smita fór úr því að vera 31í gær í að vera 104 í dag,“ er haft eftir Tony Ryall, heilbrigðisráðherra Nýja-Sjálands. Segir hann fjölda grunaðra smita vera í hópi nánustu aðstandenda þeirra sem eru með staðfest svínflensutilfelli sem og í hópi flugfarþega sem deildu flugi með þeim.

„Við gerum allt til þess að greina þá alla þá sem gætu hugsanlega verið með smit til þess að við getum boðið þeim viðeigandi meðferð og stuðning, auk þess að hindra frekari útbreiðslu flensunnar.“ 

Alþjóðaheilbrigðismálastofnunin (WHO) hækkaði í gærkvöld viðbúnaðarstig vegna svínaflensunnar í fimm á sex stiga skala sínum. 

Fran McGrath, yfirmaður heilbrigðismála, telur ljóst að fjöldi smitaðra muni aukast á Nýja-Sjálandi. Hún tók þó fram að þeir Nýsjálendingar sem greinst hafi með veiruna hafi enn sem komið er ekki veikst alvarleg. 

„Veiran smitast auðveldlega. Einkennin sem sjáum er enn í mildari kantinum,“  segir Fran McGrath.