Radovan Karadzic þegar hann hvarf, þegar hann fannst og þegar hann mætti fyrir stríðsglæpadómstólinn. STAFF

Bosníski stríðsglæpamaðurinn Radovan Karadzic lagði í dag fram beiðni þess efnis að dómari, sem þykir líklegur til að dæma í máli hans fyrir stríðsglæpadómstólnum í Haag, verði metinn vanhæfur til að dæma.

Dómarinn, Frakkinn Michele Picard, er einn þriggja dómara sem fara með forréttarhöld í máli hans. Karadzic telur hana vanhæfa þar sem hún hafi verið forseti mannréttindasamtaka í Bosníu og Hersegóvínu, í skriflegri beiðni sem hann sendi frá sér í dag.

Þátttaka hennar í samtökunum og ,,barátta hennar fyrir múslimsk fórnarlömb og gegn serbnesku einingunni sem Dr. Karadzic stofnaði og leiddi, skapar óásættanlega fordóma," skrifar hann. Hann segir þar einnig að Picard hafi þegar tekið afstöðu til sumra staðreyndanna sem deilt sé um í málinu, svo sem fjöldamorðsins á 8.000 múslimum í Srebrenica árið 1995, sem hann er sakaður um að hafa fyrirskipað.

Karadzic sætir ellefu ákæruatriðum um stríðsglæpi, glæpi gegn mannkyninu og þjóðarmorð, sem tengjast öll þætti hans í stríðinu í Bosníu 1992 til 1995. Hann var handtekinn í Belgrad í júlí árið 2008, þar sem hann hafði tilbúið sig sem sérfræðing í óhefðbundnum lækningum undir nafninu Dragan Dabic. Hann hafði þá verið eftirlýstur í þrettán ár.

Hann er meðal annars ákærður fyrir að hafa ætlað að "fjarlægja endanlega" alla bosníska múslima og Króata frá yfirráðasvæðum Serba og að "útrýma" bosnískum múslimum í Srebrenica.

Karadzic heldur því fram að samkomulag sem hann hafi gert við bandaríska ríkiserindrekann Richard Holbrook, veiti honum undanþágu frá málsókn.