Frumskógunum í Amazon er oft lýst sem lungum heimsins. RICKEY ROGERS

Samkvæmt nýrri skýrslu er mun ódýrara en áður var talið að bjarga heiminum frá loftlagsáhrifum. Það kostar aðeins 1.866 kr. á ári fyrir hvern jaðarbúa. Þetta kemur fram á vef danska dagblaðsins Politiken.

Í nýrri skýrslu frá ráðgjafarfyrirtækinu McKinsey kemur fram að fyrir 75 milljarða evra árlegt framlag fram til ársins 2030 væri hægt að halda alheimshækkun á hitastigi undir þeim tveimur gráðum sem þykja skipta sköpum. 

Útreikningar McKinsey sýna að kostnaðurinn við að vinna gegn hlýnun andrúmsloftsins er aðeins 0,2% af samanlagðri þjóðarframleiðslu þjóða heims. Það þýðir að útreikningar ráðgjafafyrirtækisins eru á mun hagstæðari nótum en útreikningar sérfræðinga Sameinuðu þjóðanna á sviði hlýnunar andrúmsloftsins. 

„Okkar útreikningar sýna minni kostnað en loftlagsskýrsla SÞ og útreikningar Nicholas Stern,“  er haft eftir Jeremy Oppenheim, framkvæmdastjóri hjá McKinsey.

Samkvæmt skýrslu Stern myndi aðgerðir til þess að vinna gegn loftlagsbreytingum kosta um 1% af þjóðarframleiðslu heimsins. Ástæða þess að  kostnaðurinn er lægri í McKinsey skýrslunni stafar af því að þar er reiknað inn í dæmið hin jákvæðu aukaáhrif hlýnunar andrúmsloftsins. 

Að mati skýrsluhöfunda ætti að líta á margar af þeim lausnum sem vísindamenn hafa lagt fram, til þess að vinna gegn hlýnun andrúmsloftsins, sem jákvæða fjárfestingu en ekki fórnarkostnað, þar sem lausnirnar minnka útblástur koltvísýrings og hafa því sparnað í för með sér. 

Skýrslan verður kynnt opinberlega á alþjóðafundi fulltrúa viðskiptalífsins um loftlagsbreytingar (Worl Business Summit on Climate Change) sem fram fer í Kaupmannahöfn 24.-26. maí nk.