Breska konan Karen Matthews segist sakna kynlífs, verslana og þess að drekka kaffi með nágrönnum sínum en Matthews situr í fangelsi eftir að hafa verið fundin sek um að ræna dóttur sinni Shannon á síðasta ári. Þetta kemur fram á fréttavef Sky.

 Matthews, sem er 33 ára, minnist ekki einu orði á börn sín sjö í viðtali sem blaðamaður Daily Mirror tók við hana í Peterborough fangelsinu en þar afplánar hún  átta ára fangelsisdóm fyrir að skipuleggja ránið á Shannon með það fyrir augum að fá síðan fundarlaun fyrir hana.

Matthews heldur fram sakleysi sínu í viðtalinu og segist hafa verið blekkt af dæmdum samverkamanni sínum Michael Donovan. Shannon fannst í sængurveraskúffu á heimili Donivans eftir mestu leit bresku lögreglunnar að horfnu barni til þessa.

„Það sem alltaf hefur komið mér í vanda eru karlar,” segir hún. „Mér er kennt um allt. Mér þykir þetta leitt. Þykir leitt að vera hér fangelsuð fyrir eitthvað sem ég gerði ekki. Ég verð að finna út úr því hvers vegna ég sæki alltaf í ranga karlmenn. Sökinni var komið á mig. Ég gerði þetta ekki. Mér er sama um peninga en hvernig á ég nokkurn tíma að geta sannað að ég sé saklaus?” 

Matthews staðhæfir einnig í viðtalinu að hún hafi varla þekkt Donovan. „Ég vissi ekki einu sinni hvar hann bjó,” segir hún. „Hann veit sannleikann. Donovan tók þátt í áætlun sem miðaði að því að koma sökinni á mig. Þeir vildu að mér yrði kennt um. Það var allt skipulagt.

Matthews segist hafa slitið öll tengsl við fyrrum sambýlismann sinn Craig Meehan, sem er tengdur Donovan en barnaklám fannst í tölvu Meehan er rannsókn á hvarfi Shannon stóð yfir. Þá segist hún nú hafa tekið upp ástarsamband við fyrrum unnnusta systur sinnar.