Danskir vítisenglar hafa ítrekað reynt að koma til Íslands, en ávallt verið vísað frá. mbl.is

Danski þjóðarflokkurinn vill banna vélhjólasamtökin Vítisengla og alla þeirra starfsemi í Danmörku. Frá þessu er greint á vef danska dagblaðsins Berlingske Tidende.

Eins vill flokkurinn að ýmis skipulögð glæpasamtök innflytjenda verði bönnuð og vísar þar til greinar nr. 78 í dönsku stjórnarskránni þar sem heimilað er að banna með dómi hvers kyns félagasamtök sem starfa eða koma sjónarmiðum sínum á framfæri með ofbeldi eða hvers kyns sambærilegri hegðun sem brýtur í bága við frelsi annarra og réttindi.

Talsmenn þjóðarflokksins segja Kaupmannahafnarbúa langþreytta á sífelldum skærum glæpasamtaka og nú sé veislunni hreinlega lokið eins og þeir orða það.

Hugmynd Danska þjóðarflokksins er ekki ný af nálinu því sambærileg hugmynd var reynd skömmu fyrir síðustu aldamót, en þá mistókst að koma bönum á Vítisengla. Heimildir Berlingske herma að forsvarsmenn Vinstriflokksins, Íhaldsflokksins og Sósíalistaflokksins séu hrifnir af hugmynd Danska þjóðarflokksins og tilbúnir til þess að láta ríkislögmanninn rannsaka Vítisengla.