John Demjanjuk var í nótt fluttur frá Bandaríkjunum til Þýskalands og lenti flugvél hans í München laust eftir klukkan 7 að íslenskum tíma. Demjanjuk, sem er 89 ára að aldri, er grunaður  um glæpi gegn mannkyninu á tímum síðari heimsstyrjaldarinnar.

Demjanjuk, sem fæddist í Úkraínu, hefur búið í Bandaríkjunum frá árinu 1952. Hann mun þurfa að svara til saka fyrir rétti í München en þýskir saksóknarar hafa gefið út ákæru á hendur Demjanjuk fyrir að hafa tekið þátt í að myrða 29 þúsund gyðinga í Sobibor fangabúðunum í Póllandi þegar nasistar réðu þar ríkjum.

Demjanjuk var í gærkvöldi fluttur á sjúkrabörum frá húsi sínum í Seven Hills í Ohio og ekið í sjúkrabíl á flugvöll þar sem sjúkraflugvél beið hans.    Demjanjuk verður nú fluttur til Stadelheim fangelsisins í München þar sem hann mun gangast undir læknisskoðun en fjölskylda Demjanjuks segir að hann sé alvarlega sjúkur.

Að sögn þýskra fjölmiðla mun Demjanjuk væntanlega fljótlega verða birt ákæra. Þá er hugsanlegt að maður, sem lifði af vistina í fangabúðunum, verði látinn bera kennsl á Demjanjuk. 

Demjanjuk hefur áratugum saman barist í bandarískum dómstólum gegn því að hann verði framseldur til Þýskalands. Hann tapaði þeirri baráttu loks á fimmtudag þegar hæstiréttur Bandaríkjanna dæmdi að það mætti framselja hann.  Hann segist hafa verið neyddur til að starfa fyrir nasista og hafi alls ekki gengið hart fram þegar hann var fangavörður í Sobibor.