Hermenn gæta þess að altl fari vel fram í kosningunum. Viða hefur fólk beðið í röðum til þess að komast í kjörklefana. Hér bíður hópur fyrir utan lögreglustöð í Nandigram, sem er í um 150 km fjarlægð suðvestur af Kolkata. JAYANTA SHAW

Lokakaflinn í kosningunum á Indlandi er hafinn þar sem 107 milljónir manna geta greitt atkvæði sitt. Alls hafa 714 milljónir manns atkvæðarétt í kosningunum sem staðið hafa síðan 16. apríl og lýkur í dag. Atkvæðin verða talin nk. laugardag. Frá þessu segir á vef breska ríkisútvarpsins. 

Alls hafa tæplega 829 þúsund kjörstaðir verið nýttir í kosningunum í 86 kjördæmum sem dreifast á hin níu héröð landsins. 

Aðalslagurinn stendur annars vegar milli núverandi stjórnarflokka sem Congress-flokksins leiðir og hins vegar flokka undir leiðsögn BJP. 

Niðurstöður kosninganna verða tilkynntar nk. laugardag og fyrirfram er ekki búist við því að önnur blokkin fái hreinan meirihluta.  Fyrstu útgönguspár verða birtar í kringum hádegisbilið að íslenskum tíma. 

Meðal þeirra sem greitt geta atkvæði í dag eru íbúar í fylkjunum Punjab, Kashmir, Himachal Pradesh, Uttarakhand, Uttar Pradesh, Vestur Bengal og Tamil Nadu. Reynsla síðustu kosninga hefur verið sú að úrslitin í síðast nefnda fylkinu hafi afgerandi áhrif á niðurstöður kosninganna, en alls eru 40 þingsæti í þessu fylki. 

Ekki er hægt að segja að kosningarnar hafi gengið algjörlega snurðulaust fyrir sig. Þannig hafa borist fréttir af því að rafrænu kosningavélarnar, sem notaðar eru, hafi bilað eða ekki virkað sem skyldi. Einnig hafa hópar aðskilnaðarsinna í Jammu og Kashmir hvatt til þess að kjósendur sniðgangi kosningarnar og í Kashmir-dalnum hafa menn gripið til verkfalla. Þegar fyrsti hluti kosninganna fór fram 16. apríl sl. efndu maóistar til óeirða í Austur- og Mið-Indlandi með þeim afleiðingum að 17 manns létu lífið. 

Starfsmenn kosninganna sjást hér halda á rafrænum kosningavélum. AMIT GUPTA