David Cameron, formaður breska Íhaldsflokksins. Reuters

Háttsettur ráðgjafi David Cameron, formanns breska Íhaldsflokksins, hefur látið af störfum eftir að greint var frá því að hann hefði þegið óeðlilegar greiðslur frá breska ríkinu. Þetta kemur fram á fréttavef Sky.

Ráðgjafinn Andrew MacKay, sem er kvæntur þingmanninum Julie Kirkbride, hefur fengið greiddar fullar kostnaðarbætur vegna „annars heimilis” þeirra hjóna í London. Með umsókn um bæturnar lagði hann fram gögn sem varða húsnæðislán þeirra.

Á sama tíma hefur eiginkona hans fengið samsvarandi bætur vegna annars heimili sem þau eiga og hafa því tvö heimili verið skáð, á kostnað skattgreiðenda,  sem „annað heimili þeirra”.

Breskir þingmenn og embættismenn eiga rétt á kostnaðargreiðslum þurfi þeir að halda „annað heimili” vegna starfa sinna fjarri fyrsta heimili sínu.     

„Sem ráðgjafi David Cameron, hef ég líkt og aðrir starfsmenn skuggaráðuneytisins afhent allar upplýsingar um kröfur mínar um kostnaðargreiðslur þannig að hægt væri að fara yfir þær fyrir hönd flokksins,” sagði hann.

„Í gærkvöldi var mér bent á að sumar kröfurnar standist ekki nýjar reglur sem David setti með réttu fyrr í þessari viku, þrátt fyrir að þær hafi verið lagðar fram samkvæmt ráðleggingum formanns kostnaðarnefndar á þeim tíma."

MacKay sagði jafnframt að hann hefði ekki gert sér grein fyrir því að neitt væri athugavert við kröfurnar fyrr en honum hafi verið bent á það.

Mikil reiði er í Bretlandi vegna kostnaðargreiðslna til þingmanna og hefur Cameron sagt að þingmönnum flokksins verði gert að endurgreiða allan þann kostnað sem þeir hafi ranglega fengið greiddan.

Greint er frá því í fjölmiðlum í Bretlandi í dag að John Maples, þingmaður Íhaldsflokksins, hafi skráð sig til heimilis í sveitaklúbbi sínum og rekið sitt eina heimi sem „annað heimili" á kostnað skattgreiðenda.