Aung San Suu Kyi AP

Herforingjastjórnin í Búrma sætir nú miklum þrýstingi að láta Aung San Suu Kyi, friðarverðlaunahafa Nóbels og leiðtoga stjórnarandstöðunnar í landinu, lausa úr haldi en Suu Kyi var fangelsuð í gær. 

Suu Kyi var í gær ákærð fyrir að rjúfa skilyrði um stofufangelsi með því að hafa haft samband við útlending. Bandaríkjamaður var handtekinn í síðustu viku fyrir að hafa synt að heimili hennar og dvalist þar í tvo sólarhringa.

Mannréttindasamtökin Amnesty International og Human Rights Watch hvöttu Ban Ki-moon, framkvæmdastjóra Sameinuðu þjóðanna, til þess í gær að leggja sitt að mörkum til að tryggja lausn hennar. Þá hvöttu þau yfirvöld í  Kína og Indlandi til að þrýsta á stjórnvöld í Búrma í málinu.

Ban lýsti því yfir í gær að hann hefði miklar áhyggjur af málinu og Hillary Clinton, utanríkisráðherra Bandaríkjanna, sagði það valda sér miklum vonbrigðum að Suu Kyi skuli borin tilhæfulausum sökum einungis nokkrum dögum áður en gildandi stofufangelsisúrskurður yfir henni rennur út.

Yfirvöld og mannréttindasamtök í Bretlandi, Frakklandi og fleiri vestrænum ríkjum hafa einnig fordæmt aðgerðir yfirvalda í Burna gegn Suu Kyi.

Yfirvöld í Búrma hafa ekki tjáð sig um málið en stuðningsmenn Suu Kyi segja hana ekki hafa haft samband við Bandaríkjamanninn. Hún hefur að mestu verið í stofufangelsi á heimili sínu í útjaðri Rangoon undanfarin nítján ár.

Kosningar eiga að fara fram í landinu á næsta ári og telja fréttaskýrendur að herforingjastjórnin í landinu vilji nýta sér atvikið til að halda Suu Kyi í fangelsi fram yfir þær.