Donald Rumsfeld Reuter

Bandaríska sérsveitin MarSOC, sem sett var á laggirnar fyrir tilstilli Donalds Rumsfelds, fyrrverandi varnarmálaráðherra Bandaríkjanna, er sökuð um að eiga þátt í þremur alvarlegum árásum í Afganistan sem leiddu til dauða hundraða óbreyttra borgara.

MarSOC-sveitin var stofnuð fyrir þremur árum, að því er breska blaðið The Independent greinir frá. Talsverðrar óánægju gætti með stofnun sveitarinnar í landhernum og voru sérsveitarmennirnir kallaðir kúrekar sem settu svartan blett á herinn.

Fyrsta umdeilda atvikið átti sér stað í mars 2007. Eftir að hafa flýtt sér í burtu frá vettvangi sjálfsmorðsárásar nálægt héraðinu Nangahar hófu 120 hermenn, að sögn sjónarvotta, að skjóta í kringum sig og drápu þeir að minnsta kosti 19 manns. Hermennirnir kváðust hafa verið að svara skotárás en engar kúlur fundust því til sönnunar.

John Nicholson, sem þá var ofursti í Nangahar, sagðist í yfirlýsingu skammast sín vegna hegðunar sérsveitarmannanna.

Nokkrum dögum seinna er sveitin sögð hafa farið að skjóta á óbreytta borgara að nýju. Fáeinum vikum seinna var flogið með hana frá Afganistan. Við yfirheyrslur sem fylgdu í kjölfarið sagði Nicholson að sveitin hefði oft verið með aðgerðir á svæðum sem hann réð yfir án þess að láta hann vita af því fyrirfram.

Í sveitinni eru um 2.500 hermenn og hefur hún starfað í nálægt 20 löndum. Samkvæmt Independent hefur yfirmaður sveitarinnar nýlega greint frá því að sér hafi verið skipað að einbeita sér að Afganistan og Pakistan.

Sérsveitarmennirnir eru einnig sakaðir um að bera ábyrgð á loftárásunum í Farah í síðustu viku en þá féllu allt að 150 manns, þar af að minnsta kosti 90 konur og börn. Sérsveitarmennirnir segjast hafa ætlað að bjarga afgangskri lögreglusveit sem setið var um. Bæjarbúar fullyrða þó að árásin hafi verið gerð langt frá þar sem átökin voru o löngu eftir að talíbanar hefðu dregið sig í hlé.