Vellupillai Prabhakaran ásamt eiginkonu sinni. Reuters

Leiðtogi uppreisnarsveita Tamíltígra á Srí Lanka, Velupillai Prabhakaran, var skotinn til bana í morgun er hann reyndi að flýja lið stjórnarhersins. Þetta sagði háttsettur embættismaður í Srí Lanka við AFP fréttastofuna.  Prabhakaran reyndi að flýja í sjúkrabíl ásamt tveimur aðstoðarmönnum en var skotinn á flóttanum. „Hann var drepinn ásamt tveimur öðrum í bílnum. Formleg yfirlýsing verður gefin út síðar,“ sagði embættismaðurinn gegn því að verða ekki nefndur á nafn.

Aðgerðir hersins undanfarna daga hafa miðað að því að  ná Prabhakaran og öðrum yfirmönnunnum Tamóltígranna en uppreisnarmennirnir gáfu á sunnudag út yfirlýsingu um að áratugalöng barátta þeirra fyrir sjálfstæði væri nú á enda.

Átökin hafa kostað yfir 70.000 manns lífið í sjálfsmorðsárásum, sprengingum og aftökum.

Velupillai Prabhakaran, var nefndur „Sólguðinn“ af stuðningsmönnum sínum en stimplaður vægðarlaus maður með mikilmennskubrjálæði af andstæðingum. Hann er talinn vera einn áhrifamesti skæruliðaforingi síðari tíma. Í þriggja áratugalöngum átökum sem miðuðu að því að stofna heimaland fyrir Tamíla í norður og austurhluta Sri Lanka, hafði Prabhakaran tekist að standa stjórnarhernum á sporði hernaðarlega. Sveitir Prabhakaran LTTE, höfðu eigin her, sjóher og flugher.

Menn Prabhakaran tóku yfirleitt enga fanga en voru þekktir fyrir árásir og hryðjuverknað á Srí Lanka sem utan landsins. Prabhakaran var sagður bera ábyrgð á morðinu á fyrrverandi forsætisráðherra Indlands, Rajiv Gandhi, sem sendi indverskar sveitir til að afvopna tígrana árið 1987 en hrökklaðist að lokum þaðan eftir áralangan frumskógarhernað.