Alþjóða heilbrigðisstofnunin (WHO) hefur enn ekki látið undan þrýstingi um að lýsa yfir heimsfaraldri svínaflensu, þrátt fyrir að stöðugt greinist ný tilfelli og fleiri lönd bætist í hóp þeirra sem hafa orðið flensunnar vart meðal þegna sinna.

Yfirmaður stofnunarinnar, Margaret Chan, sagði aðildarríkjum í dag á árlegri heilsuráðstefnu WHO, að svo gæti verið að nú upplifðu menn aðeins „lognið á undan storminum", en WHO hefði hingað til viljað bíða með að auka við viðbúnað vegna svínaflensunnar.

Hún sagði að enn héldi stofnunin sig við viðbúnaðarstig fimm vegna faraldursins, en menn hafa velt vöngum yfir því hvort hættustigið yrði hækkað upp í hámark, eða sex, eftir að Japanir hafa neyðst til að loka yfir 2.000 skólum á síðustu dögum. Hættustig fimm merkir að heimsfaraldur gæti verið í aðsigi.

Svínaflensunnar varð fyrst vart í Ameríkuálfunum og fulltrúar WHO hafa sagt að komi upp viðvarandi smit í ríkjum utan þeirra án þess að hægt sé að rekja það beint til ferðalanga, væri komin ástæða til að lýsa yfir heimsfaraldri.

Japönsk yfirvöld lokuðu skólum og leikskólum eftir að svínaflensutilfellum fjölgaði þar í 129. Jafnframt vöruðu þau við því að raunverulegur fjöldi H1N1 smita gæti þegar skipt mörgum hundruðum.

Í New York hafa sex skólum verið lokað og heimildir herma að í bígerð sé að loka fimm til viðbótar, eftir að 55 ára aðstoðarskólastjóri í Queens lést úr veikinni. Þá lýsti bandaríska ríkisstjórnin því yfir að fjöldi svínaflensutilfella í landinu öllu væri kominn yfir 5.000.

Chan sagði á ráðstefnunni í morgun að full ástæða væri til þess að hafa áhyggjur af blöndun H1N1 veirunnar og t.a.m. fuglaflensuveirunnar (H5N1) en sérfræðingar hafa lýst áhyggjum af hugsanlegum stökkbreytingum vírusanna, sem gæti aukið mótstöðu þeirra gegn lyfjum.

Hátt í 9.000 svínaflensutilfelli hafa verið tilkynnt í um 40 löndum og yfir 70 manns hafa látist af völdum veirunnar, frá því að hún fannst fyrst í Mexíkó og Bandaríkjunum fyrir um mánuði.