Benjamin Netanyahu og Barack Obama í Hvíta húsinu. Reuters

Barack Obama Bandaríkjaforseti þrýsti á Benjamin Netanyahu, forsætisráðherra Ísraels, að samþykkja stofnun sjálfstæðs ríkis Palestínumanna og greiða þar með götu varanlegs friðar á fundi þeirra í Hvíta húsinu í dag. Var þetta fyrsti fundur leiðtoganna frá því þeir tóku við embætti.

„Það er í samræmi við hagsmuni Ísraels, Bandaríkjanna og alþjóðasamfélagsins að tveggja ríkja lausn nái fram að ganga. Við höfum séð árangur stranda á þessum vettvangi. Ég lagði það til við forsætisráðherrann að hann hafði sögulegt tækifæri til að koma alvöru hreyfingu í þessu máli á kjörtímabili sínu,“ sagði Obama eftir fundinn.

Þá minnti Obama forsætisráðherrann á að honum bæri samkvæmt vegvísinum sem samþykktur var 2003 að koma í veg fyrir frekari framrás gyðingabyggðar á Vesturbakkanum.

Kvaðst Netanyahu tilbúinn að hefja friðarviðræður þegar í stað en gaf ekki upp hvort hann styddi stofnun sjálfstæðs ríkis Palestínumanna.

Þá sagði forsætisráðherra skilyrði Ísraelsmanna að Palestínumenn viðurkenndu Ísraels sem sjálfstætt ríki gyðinga.

„Aldrei fyrr hafa arabar og Ísraelsmenn horft fram á sameiginlega ógn líkt og nú,“ sagði Netanyahu og vísaði til ógnarinnar af kjarnorkuáætlun Írana.

Á vef breska útvarpsins, BBC, kemur fram að í Ísrael óttist hægrimenn að Bandaríkin séu að færast frá staðfestu sinni við að tryggja öryggi Ísraels, á meðan talsmenn stjórnarandstöðuflokksins Kadima telji forsætisráðherrann hafa glutrað niður tækifæri til að mynda traust á milli sín og forsetans.

Barack Obama. Reuters