Töluverð spenna er í Ísrael vegna fundar Benjamin Netanyahu, forsætisráðherra landsins og Baracks Obama forseta Bandaríkjanna í dag. Fundurinn er fyrsti fundur þeirra frá því þeir tóku báðir við embætti og er talið líklegt að þar mætist stálin stinn varðandi friðarferlið í Miðausturlöndum. Þetta kemur fram á fréttavef Ha'aretz. 

Líklegt þykir að Obama þrýsti á Netanyahu að samþykkja að vinna að stofnun sjálfstæðs ríkis Palestínumanna en hörð andstaða er við það innan ríkisstjórnar Netanyahus.

Það þykir auka enn frekar á spennuna í tengslum við heimsóknina að Sara eiginkona Netanyahu er með honum í för en hún er mjög umdeild í Ísrael. Er hún sögð hafa farið fram á að fá að hitta Michelle Obama, eiginkonu Bandaríkjaforseta, í ferðinni en ekki stóð til að Michelle yrði í Washington þá daga sem Netanyahu-hjónin dvelja þar.  

Til stendur að Michelle Obama opni nýja álmu Metropolitan Museum of Art í New York og að hún verði síðan  heiðursgestur á hátíðardansleik American Ballet Theatre þar í borg.

Fréttaskýrendur í Ísrael spá því hins vegar að hún muni gera nauðsynlegar breytingar á ferðaáætlun sinni til að geta hitt Söru, dregið þannig úr spennu á alþjóðavettvangi og komist hjá hugsanlegri gagnrýni fyrir að sinna ekki pólitískum skyldum sínum.