Ríkissjónvarp Srí Lanka sýndi í morgun myndir, sem sagðar voru af líki Velupillai Prabhakaran, leiðtoga Tamíl-Tígranna. Mahinda Rajapakse, forseti Srí Lanka lýsti í dag yfir sigri í aldarfjórðungs stríði við uppreisnarmenn Tamíla og hét því jafnframt í sjónvarpsávarpi, að leitað yrði lausna á deilum þjóðflokka í landinu.

„Ríkisstjórnin sigraðist á hryðjuverkastarfsemi þótt margir hafi talið slíkt ógerlegt," sagði forsetinn. Hann lagði jafnframt áherslu á að þetta hefði ekki í för með sér að Tamílar yrðu undirokaðir. „Allir eiga að hafa jafnan rétt. Þeir eiga rétt á að lifa án ótta og efasemda. Við skulum öll sameinast." 

Stjórnarherinn sagði í gær að Prabhakaran hefði látið lífið ásamt tveimur helstu aðstoðarmönnum sínum þegar þeir reyndu að flýja í sjúkrabíl. Í morgun sögðu talsmenn Tamíl-Tígranna hins vegar á vefsíðu, sem þeim tengist að leiðtoginn væri enn á lífi og myndi halda áfram baráttu fyrir heimastjórn Tamíla. 

Viðbrögð stjórnvalda voru að sýna myndir af líki, sem sagt var vera af  Velupillai Prabhakaran. Myndirnar, sem einnig voru sýndar í fleiri sjónvarpsstöðvum, sýndu efri hluta líks sem klætt var í herbúning. Hluti höfuðsins var hulinn bláum klúti en andlitið sást og var Prabhakaran þekkjanlegur.

Einnig sást einkennismerki með tölunum 0.01 og persónuskilríki gefin út af Tamíl-Tígrunum.

Tamíla-Tígrarnir hafa lengi verið taldir einhver harðvítugustu skæruliðasamtök sögunnar og réðu um hríð yfir þriðjungi Srí Lanka. Fullyrt var að þeir bæru á sér blásýrutöflu til að geta fyrirfarið sér ef þeir næðust lifandi. Þeir voru alræmdir fyrir hryðjuverk jafnt á Srí Lanka sem utanlands. Yfir 30 ríki hafa sett Tígrana á lista yfir hryðjuverkasamtök.

Leiðtoginn, Velupillai Prabhakaran, skipulagði að sögn sjálfsmorðstilræðið sem varð forsætisráðherra Indlands, Rajiv Gandhi, að bana en hann sendi indverskt herlið gegn Tígrunum 1987. Tígrarnir, sem eru hindúar, voru ein fyrsta hreyfing heims til að beita skipulega sjálfsmorðsárásum en fleiri samtök sigldu í kjölfarið, ekki síst í ríkjum múslíma. 

Blaðamaður horfir á útsendingu ríkissjónvarps Srí Lanka þar sem sýndar voru myndir af líki leiðtoga Tamíl-Tígra. Reuters