Forsætisráðherra Ítalíu, Silvio Berlusconi, sagði í dag að hann væri sannfærður um að ítalska þjóðin stæði með honum á sama tíma og hann harðneitaði að eiga í ástarsambandi við unglingsstúlku líkt og ýjað hefur verið að.

Berlusconi hefur verið harðlega gagnrýndur eftir að hann mætti í átján ára afmæli Noemi Letizia. Veronica Lario, eiginkona Berlusconis, lýsti því opinberlega yfir í kjölfarið að hún vildi fá skilnað frá eiginmanni sínum vegna þess að hann væri að eltast við ólögráða stúlkur. Vísaði hún sérstaklega til þess að maður hennar hefði mætt í afmælisveislu Letizi í Mílanó.

Segir Berlusconi að ekkert sé í gangi milli hans og Letizi og það sé fáránlegt að fólk skuli notað persónuleg málefni í pólitískum tilgangi.

„Ég mun ekki glata stuðningi Ítala og enn einu sinni munu þessar ásakanir virka eins og bjúgverpill gegn því fólki sem kom þessum orðrómi af stað," sagði Berlusconi í viðtalinu.

Berlusconi biðlaði til eiginkonunnar í viðtalinu og segir að hún eigi ekki að trúa öllu sem sagt er um hann í dagblöðum. Þau hjón hafa verið gift í nítján ár.

„Jafnvel eiginkona mín féll fyrir þessari vitleysu og trúði því sem fjölmiðlar segja."