Millvina Dean horfir gegnum kýrauga úr Titanic. Reuters

Millvina Dean, eini farþeginn í farþegaskipinu Titanic sem enn var á lífi, lést á hjúkrunarheimilli á Englandi í dag, 97 ára að aldri.  Dean var 9 vikna gömul þegar Titanic sökk í Atlantshaf  14. apríl árið 1912 eftir að hafa rekist á ísjaka.

Dean, sem hét fullu nafni Elizabeth Gladys Dean en var jafnan kölluð Millvina, komst lífs af ásamt Georgette Eva, móður sinni og Bertram, bróður sínum, þegar Titanic sökk. Faðir hennar, Bertram Frank, fórst hins vegar og 1500 aðrir farþegar. 

Fjölskylda Deans fór um borð í Titanic í Southamton á Englandi og ætlaði að hefja nýtt líf í Kansas í Bandaríkjunum þar sem fjölskyldufaðirinn vonaðist til að opna tóbaksbúð.

Millvina, sem fæddist 12. febrúar 1912, var yngsti farþeginn í skipinu. Það var þá stærsta og tæknilega fullkomnasta farþegaskip heims og fullyrt var að það gæti ekki sokkið.

Skipið rakst á ísjaka í jómfrúrferð sinni klukkan 23:40 að kvöldi 14. apríl 1912. Tveimur tímum og 40 mínútum síðar sökk skipið í sæ.

Dean var flutt aftur til Southampton ásamt fjölskyldu sinni. Hún var átta ára gömul þegar hún fékk fyrst að vita að hún hefði verið í skipinu.

Dean vann sem kortagerðarmaður fyrir breska ríkið í síðari heimsstyrjöld og starfaði síðan hjá verkfræðistofu. Hún sagði við blaðamenn, að hún hefði skyndilega orðið fræg þegar flakið af Titanic fannst árið 1985 og veitti þá fjölda viðtala. Henni var boðið að ljúka ferðinni yfir Atlantshaf til Bandaríkjanna með skipinu QE2 árið 1997 og hún þáði það boð. Hún hafnaði hins vegar boði um að vera viðstödd frumsýningu kvikmyndarinnar Titanic vegna þess að hún taldi að það yrði of erfitt.

Millvina flutti á hjúkrunarheimili í Hamshire fyrir þremur árum eftir að hún mjaðmargrindarbrotnaði. Hún neyddist til að selja ýmsa muni, tengda Titanic, á uppboði á síðasta ári, svo sem bréf, sem móðir hennar fékk frá ýmsum aðilum í kjölfar slyssins.

Þá seldi hún einnig aldargamla ferðatösku fulla af fötum, sem fólk í New York gaf fjölskyldunni. 

Titanic árið 1912. AP