Ayman al-Zawahiri. AP

Ayman al-Zawahiri, næstráðandi Osama bin Ladens í hryðjuverkasamtökunum al-Qaeda, sagði í ræðu að múslimar hefðu heyrt blóðug boð Baracks Obama, Bandaríkjaforseta, í aðdraganda heimsóknar hans til Miðausturlanda.

„Blóðug boð hans hafa verið meðtekin af múslinum og þau eru enn að berast og almannatengslaherferðum eða farsakenndum heimsóknum og fáguðum orðum tekst ekki að fela þau," sagði al-Zawahiri í ræðunni.

Bandaríska stofnunin SITE Intelligence Group, sem sérhæfir sig í að fylgjast með íslömskum vefsíðum skýrði frá þessu í kvöld en ræða al-Zawahiris var birt á netinu.

Al-Zawahiri sagði að Obama hefði þegar sent skýr boð til múslima með stefnu Bandaríkjamanna í málefnum Miðausturlanda og hernaði í Afganistan og Írak. 

Obama heldur í kvöld til Miðausturlanda og mun m.a. halda ræðu í Egyptalandi á fimmtudag.  Al-Zawahiri, sem er Egypti, sagði að þeir Egyptar, sem byðu Obama velkominn, væru þrælar Bandaríkjanna, sem hefðu gert Egyptaland að alþjóðlegri pyntingastöð.

Hvatti hann Egypta til að hunsa Obama, „þennan glæpamann sem reynir með blekkingum að ná því fram sem honum tókst ekki á jörðu niðri þegar stríðsmennirnir komu í veg fyrir  ætlunarverk Bandaríkjanna í Írak, Afganistan og Sómalíu."