Jacqui Smith, innanríkisráðherra Bretlands, mun samkvæmt heimildum BBC láta af því embætti eftir að kosningar til Evrópuþingsins fara fram í Bretlandi á fimmtudag. Gordon Brown, forsætisráðherra Bretlands, hefur nú staðfest að hann hyggist gera breytingar á ríkisstjórn sinni eftir kosningarnar. Þetta kemur fram á fréttavef BBC. 

Brown hefur neitað að tjá sig frekar um fyrirhugaðar ráðherrabreytingar en Smith er sögð hafa farið fram á flutning á milli ráðuneyta fyrir tveimur mánuðum. Samkvæmt heimildum BBC mun hún þó staðráðin í að sitja áfram í ríkisstjórn og er hún nú sögð berjast fyrir því með kjafti og klóm. 

Smith er ein af þeim bresku þingmönnum sem þykja hafa teygt reglur um kostnaðargreiðslur vegna heimilishalds í London langt út fyrir eðlileg mörk en hún skráði hún heimili systur sinnar sem heimili  sitt í borginni og fékk fullar kostnaðargreiðslur út á það.

Áður en upplýsingum um kostnaðarmál þingmanna var lekið til blaðsins Daily Telegraph vakti það mikla athygli er fréttist að eiginmaður hennar hefði sent ríkissjóði reikning vegna tveggja klámmynda sem hann leigði. Smith sagði það hafa verið gert fyrir mistök. 

 Hún hefur einnig sætt harðri gagnrýni fyrir að fara fram á lögreglurannsókn á upplýsingaleka úr ráðuneyti sínu en í kjölfar rannsóknarinnar var Damian Green, þingmaður Íhaldsflokksins og talsmaður hans í málefnum innflytjenda handtekinn í nóvember á síðasta ári.