Gordon Brown forsætisráðherra Bretlands. Reuters

Kosningar til sveitarstjórna og Evrópuþingsins fara fram í Bretlandi í dag en talið er líklegt að Verkamannaflokkurinn bíði afhroð í kosningunum. Ekki er gert ráð fyrir að niðurstöður kosninganna liggi að fullu fyrir fyrr en á sunnudagskvöld. Þetta kemur fram á fréttavef Sky. 

Kosningum lýkur í öllum sveitarfélögum í kvöld en kjörstjórnir margra þeirra gera ekki grein fyrir niðurstöðunum fyrr en á morgun eða laugardag. Þá verður niðurstaða Evrópuþingskosninganna fyrst kynnt á sunnudagskvöld. 

Talið er að Gordon Brown forsætisráðherra Bretlands, eigi pólitíska framtíð sína að miklu leyti undir niðurstöðunum í Nottingham, Stafford og Derby þar sem Verkamannaflokkurinn hefur meirihluta og því hvort honum takist að endurheimta meirihluta sinn í Lancaster.

Leiðtogar Íhaldsmanna hafa lýst því yfir að þeir séu bjartsýnir á að ná meirihluta í Stafford og einnig munu þeir telja góða möguleika á því í Nottingham. Það mun hins vegar verða sérstaklega mikið áfall fyrir Brown missi Verkamannaflokkurinn meirihluta sinn í Derby en raunverulegur möguleiki er á því samkvæmt skoðanakönnunum.

Verkamannaflokkurinn hefur nú 445 sveitarstjórnarþingmenn og benda skoðanakannanir til þess að þeir muni missa hundrað þeirra til Íhaldsflokksins í kosningunum í dag. Einnig eru líkur á að borgarstjórar Verkamannaflokksins í  Doncaster og Norður-Tyneside tapi fyrir frambjóðendum Íhaldsflokksins.