Bandarískur maður hefur verið handtekinn fyrir að fá mann til þess að nauðga eiginkonu sinni á heimili þeirra. Maðurinn komst í samband við nauðgarann á auglýsingavefnum Craigslist þar sem hann auglýsti með óbeinum hætti eftir vitorðsmanni. Þetta kemur fram á fréttavef Sky. Mannsins, sem nauðgaði konunni og ógnaði henni með hnífi, er enn leitað en lögregla segist hafa góðar vísbendingar til að styðjast við. 

Eiginmaðurinn, sem er 25 ára frá Kannapolis í Norður-Karólínu, á yfir höfði sér ákæru vegna ofbeldisfullrar nauðgunar.

Forsvarsmenn Craigslist eru nú undir miklum þrýstingi að ritskoða síðuna eftir að upp hafa komið nokkur mál þar sem hún hefur verið notuð til að skipuleggja glæpi.

 Þá var námsmaður fyrr á þessu ári ákærður fyrir morð á stúlku sem hann kynntist á síðunni.

 Forsvarsmenn síðunnar hafa þegar látið undan þrýstingi og fjarlægt upplýsingasíðu sína um kynlífsþjónustu.