Lögreglan í Svíþjóð hefur nú í haldi tvö 16 ára ungmenni grunuð um morð á jafnöldru sinni. Að sögn Aftonbladet fannst stúlkan illa leikin í skógarrjóðri í nótt eftir bekkjarpartý og lést skömmu síðar.

Ungmennin tvö sem grunuð eru um aðild að ódæðinu eru nú í yfirheyrslum hjá lögreglu. Tveir aðrir skólafélagar fundu stúlkuna um kl. tvö í nótt í Stureby, sem er lítill bær út frá Stokkhólmi. Skólafélagarnir hringdu strax í fullorðna sem kölluðu strax eftir sjúkrabíl.

Ekki tókst að bjarga lífi stúlkunnar og grunaði lögreglu strax að um morð væri að ræða. Stúlkan hafði augljóslega verið beitt ofbeldi en réttarmeinalæknar rannsaka nú hver nákvæm dánarorsök hennar var.

Bekkjarfélagar stúlkunnar höfðu verið með gleðskap í grennd við skógarrjóðrið og strax í nótt yfirheyrði lögregla fjölmarga þeirra sem og fullorðna. Fljótlega kom fram mögulegt tilefni og síðar um nóttina var 16 ára piltur handtekinn grunaður um morðið. Í morgun var svo stúlka á sama aldri handtekin, grunuð um aðild að verknaðinum. Bæði ungmennin voru í sama vinahóp og hin látna.

Enn hefur morðvopnið ekki fundist en lögreglan telur að ráðist hafi verið á stúlkuna á þeim stað þar sem hún fannst.