Dóttir einnar ríkustu konu í Finnlandi slapp úr greipum mannræningja á föstudag eftir að greitt hafði verið 8-10 milljóna evra lausnargjald, jafnvirði 1,5-1,8 milljarða króna.

Maður, sem grunaður er um ránið, var handtekinn um helgina og er um að ræða lögfræðing, sem m.a. hefur kennt við háskólanna í Turku og bauð sig fram í síðustu sveitarstjórnakosningum í Finnlandi.

Í ljós hefur komið, að Minna Nurminen, 26 ára, var rænt í lok maí. Fjölskylda hennar ákvað í samráði við lögreglu að greiða lausnargjald fyrir hana og það var gert. Nurminen fannst síðan í skógi í Vahto á föstudag. 

Á föstudag, áður en fréttist af mannráninu, bárust fréttir af því að peningaseðlar hefðu fundist á bílastæði í Turku. Að sögn finnskra fjölmiðla hefur lögregla sagt, að peningarnir hafi verið hluti af lausnargjaldinu og svo virðist, sem mannræninginn hafi misst þá í flýtinum. 

Ekki hefur verið upplýst hvernig meintur mannræningi náðist. Um er að ræða 44 ára gamlan lögfræðing sem hefur kennt við lögfræðideild háskólans í Turku. Þá var hann í framboði fyrir finnska Jafnaðarmannaflokkinn í bæjarstjórnarkosningum í borginni. Viðurlög við mannráni eru allt að 10 ára fangelsi.