Frá Teheran þar sem mikil mótmæli fóru fram í gær. Reuters

Öryggissveitir í Íran handtóku að minnsta kosti tíu leiðtoga umbótasinna í landinu í nótt eftir að til átaka kom á götum úti í Teheran í gær í kjölfar þess að yfirburðasigri Mahmoud Ahmadinejad, forseta landsins, var lýst yfir í forsetakosningum.

Um hundrað umbótasinnar til viðbótar eru sagðir hafa verið handteknir og a.m.k. einn mótmælandi er sagður hafa fallið fyrir byssukúlu lögreglu í gær.

Helsti keppinautur hans Hossein Mousavi sakaði yfirvöld um kosningasvindl eftir að úrslitin voru kynnt í gær en sigur Ahmadinejad (63%) var mun meiri en allar spár höfðu gefið til kynna.

Á meðal hinna handteknu eru nánir samstarfsmenn Mohmmad Khatami, fyrrum forseta landsins sem er yfirlýstur stuðningsmanns Mousavi.

Þúsundir manna tóku þátt í mótmælaaðgerðum í Teheran í gær og kveiktu þeir m.a. í bílum og opinberum byggingum.

Ahmadinejad hvatti í gær stuðningsmenn sína til að fjölmenna í miðborgina í dag og fagna sigrinum. Talið er að hann muni þá ávarpa þjóðina.

Khamenei, æðstiklerkur Írans, fagnaði einnig sigri Ahmadinejad í gær og hvatti þjóðina til að sameinast að baki honum.

Kosningabaráttan nú þótti hins harðasta í landinu frá íslömsku byltingunni árið 1979.

Farsímasamband lá niðri í borginni í gær en er nú komið á í hluta hennar. Þá var um tíma lokað fyrir netaðgang.