Gordon Brown forsætisráðherra Breta á tröppum embættisbústaðar síns við Downingstræti 10. Reuters

Birtar hafa verið upplýsingar um allar kostnaðarkröfur breskra þingmanna undanfarin fjögur ár eftir að dómari úrskurðaði í málinu. Nokkur atriði hafa þó verið þurrkuð út úr skjölunum sem birt eru á netinu. Þetta kemur fram á fréttavef BBC.

Alls voru birtar 1,2 milljónir blaðsíðna á heimasíðu breska þingsins í morgun. Á meðal þeirra upplýsinga sem ekki eru birtar eru heimilisföng sem kröfur tengjast og því er til dæmis ekki hægt að lesa út úr þeim hvort þingmenn fluttu heimilisföng sín á tímabilinu.  

Kitty Ussher, undirfjármálaráðherra bresku stjórnarinnar, bættist í gær í hóp þeirra ráðherra sem sagt hafa af sér að undanförnu vegna umfjöllunar um kostnaðargreiðslur til hennar. Er hún sögð hafa flutt heimilisfag sitt til að komast hjá því að greiða skatt af verðmætaaukningu heimilis síns.  

Ussher staðhæfir að hún hafi ekki brotið neinar reglur en að hún hafi ákveðið að hætta til a hlífa stjórninni við frekari umræðum um mál sitt.

Nick Robinson, fréttaskýrandi BBC, segir að hefði þeim upplýsingum sem þurrkaðar eru út úr gögnunum ekki verið lekið í fjölmiðla hefðu mál Ussher og fleiri ráðherra, sem sagt hafa af sér, ekki virst neitt óeðlileg.

Samkvæmt gögnunum hafa allir 646 þingmenn neðri deildar breska þingsins farið fram á kostnaðargreiðslur frá árinu 2004. Flestar eru kröfurnar vegna heimilishalds í London.