Fyrirsæta með gimsteina frá Harry Winston. Reuters

Franskir lögreglumenn sem hafa rannsakað gimsteinarán sem framið var hjá Harry Winston skartgripasalanum í París hafa handtekið 20 manns í tengslum við ránið og lagt hald á gimsteina sem metnir eru á 85 milljón evrur.

Handtökurnar fóru fram í gær og í dag á Parísarsvæðinu eftir að lögreglan komst á snoðir um komu manns sem þekktur er fyrir að versla með stolna skartgripi til Parísar.

Ránið var framið í desember síðast liðnum og voru 700 þúsund evrur í boði fyrir upplýsingar sem gætu leitt til lausnar málsins.

Þjófagengið samanstóð af fjórum þjófum, tveir þeirra voru dulbúnir sem konur og stálu þeir nánast öllum þeim skartgripum sem til sýnis voru í verslun Harry Winston skammt frá Champs-Elyseés breiðgötunni í París.

Lögreglan tilkynnti að ræningjarnir hafi verið fagmenn sem töluðu frönsku með austur-evrópskum hreim en vel væri hugsanlegt að þeir hafi unnið verkið fyrir einhverja aðra glæpamenn svo sem franska glæpahringi.

Lögreglan rannsakaði einnig annað rán sem framið var sömu verslun ári áður þar sem um 20 milljón evrum var stolið, hugsanlegt er að tengsl séu þar á milli.