Sænska ríkisstjórnin vísaði kínverskum sendiráðsstarfsmanni úr landi í síðustu viku og var honum gefið að sök að hafa stuðlað að njósnum um pólitíska flóttamenn. Skömmu síðar vísaði stjórnin í Peking starfsmanni sænska sendiráðsins þar í borg úr landi í mótmælaskyni.

Sænskir fjölmiðlar og AFP fréttastofan skýra frá því að deilan hafi komið í kjölfar þess að sænska leynilögreglan SÄPO handtók 61 árs mann sem er með sænskan ríkisborgararétt fyrir að stunda njósnir um múslímska flóttamenn sem eru ættaðir frá sjálfsstjórnarhéraðinu Xingjiang í norðvesturhluta Kína.

Fólkið sem þar býr nefnist Uigur sem er þjóðarbrot sem talar tyrkneska mállýsku og hefur sætt ofsóknum kínverskra yfirvalda.

Sænsk yfirvöld hafa ekki staðfest annað en að þau hafi vísað erlendum sendiráðsmanni úr landi og að viðkomandi land hafi svarað í sömu mynt.

Um 100 Uigúar eru í Svíþjóð með stöðu flóttamanna en njósnarinn sem var handtekinn kom til landsins á síðasta áratug síðustu aldar sem pólitískur flóttamaður. Hann á yfir höfði sér 4 ára fangelsi.