Sagan af Nedu tekur breytingum

Svo virðst sem maður, sem kveðst hafa verið unnustu írönsku konunnar Nedu Agha Soltan, hafi nú breytt frásögn sinni af því hvernig dauða hennar bar að. Fréttir af dauða konunnar eru óljósar en myndband hefur verið birt á netinu sem sagt er sýna þegar henni blæðir út á götu í Teheran.

Haft var eftir manninum, Caspian Makan, á fréttavef BBC í morgun að konan hafi einungis verið að kæla sig þar sem hún hafi setið föst í umferðahnút ásamt kennara sínum er á hana var skotið.

Þó hefur verið talað um konuna sem tákn mótmælenda í Teheran og nú hefur annað myndband verið birt sem sagt er sýna hana í hópi mótmælenda.  

Þá er birt viðtal við Markan á fréttavef Daily Telegraph í dag þar sem hann segir hana hafa farið út til að taka þátt í mótmælunum og að það eina sem hún hafi viljað hafi verið „lýðræði og frelsi fyrir írönsku þjóðina".

„Ég reyndi að telja hana af því að fara út á götu þar sem ég hef, því miður, séð það í störfum mínum sem blaðamaður að það á sér mikið miskunnarleysi stað,” segir hann. „En hún sagði að þátttaka okkar væri þess virði jafnvel þótt kúla hitti hana í hjartað. Því miður var það þannig sem hún dó. Hún fékk kúlu í hjartað og lungun og um fimm, sex mínútum síðar lést hún” 

Markan segist hafa kynnst Solan á ferðalagi utan Írans fyrir nokkrum mánuðum og að þau hafi ætlað að gifta sig. Hefur hann lagt fram myndir af þeim saman máli sínu til stuðnings. 

Ekki hefur þó verið hægt að staðfesta að myndbandið, sem sagt er sýna dauða konunnar, sé ófalsað. Þá hafa ekki fengist staðfestar upplýsingar um það hver konan var en sagt er að hún hafi verið 27 ára heimspeki- eða guðfræðinemi.

Markan segir hins vegar í viðtalinu að hún hafi lagt háskólanámið á hilluna og snúið sér að tónlistarnámi.

• 1 blogg um fréttina

Bloggað um fréttina

• jórunn: ...en fjölmiðlar ekki