Þeim Svíum sem vilja skipta sænsku krónunni út fyrir evruna fer ört fjölgandi. Í nýrri skoðanakönnun kemur fram að ef gengið yrði til kosninga í dag myndu 43% hafna evru og 42% fagna henni en 15% hafa ekki gert upp hug sinn.

Í Dagens Nyheter kemur fram að munurinn á milli fylkinganna í þessari könnun er tölfræðilega svo lítill að hæpið er að skilja á milli. Í sambærilegri könnun sem gerð var í nóvember í fyrra höfðu þeir vinninginn sem höfnuðu evrunni með 47% gegn 38%.

Meðal sænskra karla eru fleiri sem kjósa evruna 47% á móti 40% en meðal kvenna sem tóku þátt eru fleiri sem hafna evrunni eða 46% gegn 37%.

Mesta fylgið með evrunni er að finna hjá stjórnarflokkunum, frjálslyndum í Folkpartiet og íhaldsmönnum Moderaterna. Það kemur kannski ekki á óvart að í miðjuflokknum, Centerpartiet er mjótt á mununum, helmingur með og helmingur á móti evrunni.  Þeir kjósendur sem styðja stjórnarandstöðuna er jafnframt flestir andsnúnir evrunni.

Flestir Svíar eru hlynntir því að halda áfram aðild að Evrópusambandinu eða 56% fylgjandi og 19% andvígir.