Barack Obama Bandaríkjaforseti hefur gagnrýnt framgang yfirvalda í Íran að nýju í kjölfar kosninganna sem fram fóru í landinu þann 12. júní. Sagði hann aðgerðir yfirvalda gegn mótmælendum ósanngjarnar og að það væri algerlega rangt að með því að gagnrýna þær væru vestræn ríki að hlutast til um innanríkismál Írana og ýta undir klofning í landinu. Þetta kemur fram á fréttavef BBC.

„Hótanir, ofbeldi og fangelsanir síðustu daga hafa gengið fram af Bandaríkjunum og alþjóðasamfélaginu. Ég fordæmi harðlega þær ósanngjörnu aðferðir og sameinast bandaríku þjóðinni í því að syrgja hvern einasta saklausan einstakling sem týnir lífi," sagði hann í morgun. „Bandaríkin virða sjálfstæði Íslamska lýðveldisins í Íran og skipta sér ekki af innanríkismálefnum þess. Við verðum þó að bera hugrekki og reisn írönsku þjóðarinnar vitni og þeirri opnun sem er að eiga sér stað innan íransks samfélags.

Þá sagði hann gamlan hræðsluáróður ekki virka lengur. „Það er orðið þreytt að nota gamla spennu til hræðsluáróðurs og það virkar ekki lengur í Íran," sagði hann. „Þetta snýst ekki um Bandaríkin eða Vesturlönd. Þetta snýst um írönsku þjóðina og þá framtíð sem hún, og einungis hún, mun kjósa sér. Árið 2009 er enginn hnefi nógu sterkur til að koma í veg fyrir að heimurinn beri því vitni þegar farið er fram á réttlæti með friðsamlegum hætti."

Talsmaður Bandaríkjastjórnar sagði í morgun að bandarísk yfirvöld muni ekki hvetja til allsherjarverkfalls í Íran en fylgjast náið með þróuninni þar.