Áróðursplakat af Adolf Hitler, leiðtoga nasista og Þriðja ríkisins.

Níu fyrrum félagar í SS-sveitum nasista hafa verið dæmdir í ævilangt fangelsi að sér fjarverandi fyrir að myrða 350 óbreytta borgara í Toskanahéraði á Ítalíu árið 1944.  Það var herdómstóll í Róm, sem dæmdi mennina en þeir eru á aldrinum 84 ára til níræðs.

Alls var réttað yfir ellefu fyrrum nasistum vegna fjöldamorðanna en einn þeirra lést meðan á réttarhöldunum stóð og annar var sýknaður. Hinir níu voru dæmdir í ævilangt fangelsi fyrir aðild að morðum á óbreyttum ítölskum borgurum, þar á meðal konum, börnum og gamalmennum. 

Þýskaland var einnig talið hafa átt þátt í glæpunum og var dæmt til að greiða fjölskyldum fórnarlambanna 1,25 milljónir evra í bætur.

Fólkið, sem var myrt, bjó í þorpum í Fivizzano. Morðin voru framin á tímabilinu 19.  til 27. ágúst 1944. 53 karlmenn voru skotnir og líkum þeirra var stillt upp á víðavangi undir skilti sem á stóð: Þetta eru örlög þeirra sem hjálpa andspyrnumönnum.

Málarekstur vegna morðanna hófst að nýju eftir að ferilskrár 695 nasista, sem áttu yfir höfði sér málssókn vegna stríðsglæpa framinna á undanhaldi Þjóðverja frá Toskana og  Emilia-Romagna, fundust í skáp árið 1994.