Hamid Karzai. Reuters

Hamid Karzai, forsteti Afganistans, hvatti í dag talibana í landinu til að kjósa frekar í forsetakosningunum, sem verða í ágúst, frekar en að ráðast á kjörstaði og kjósendur.

Á blaðamannafundi í morgun sagði Karzai, að allir Afganar ættu að skrá sig á kjörskrá og greiða atkvæði í kosningunum sem fara fram 20. ágúst. Auk forsetakosninganna verður einnig kjörið í sveitarstjórnir.  

„Það er einnig ósk mín að bræður okkar, talibanar, og aðrir Afganar sem ekki dvelja í Afganistan af einhverjum ástæðum og eru andvígir stjórnvöldum... ég bið þá enn og aftur að hætta ofbeldisverkum, ekki aðeins á kjördag heldur um alla framtíð," sagði Karzai.

„Ég bið einnig um það, að þeir fari í heimahéröð sín, skrái sig og taki þátt í kosningunum," sagði Karzai. 

Hann var væntanlega að vísa til uppreisnarmanna, sem hafa búið um sig í Pakistan en margir landflótta talibanar, þar á meðal leiðtogi þeirra, Mohammad Omar, eru sagðir hafa flúið þangað eftir innrás Bandaríkjamanna árið 2001.

Þetta er í annað skipti, sem forsetakosningar fara fram í Afganistan og býður Karzai sig fram til endurkjörs.  Óttast er að talibanar reyni hvað þeir geti til að trufla kosningarnar og hræða kjósendur frá að taka þátt í þeim, einkum í suðurhluta landsins.