Íbúar á Gasa svæðinu eiga æ erfiðara með að sjá fyrir sér. Alvarlega veikir sjúklingar fá ekki nauðsynlega læknishjálp. Ástandið kemur einna verst niður á börnum en þau eru rúmur helmingur íbúa svæðisins. Mannúðaraðstoð getur ekki komið í staðinn fyrir trúverðugar aðgerðir á sviði stjórnmála ef takast á að fullnægja mannúðarþörfum almennings á Gasasvæðinu.
Sex mánuðir eru nú liðnir frá því að hernaðaraðgerðum Ísraelsmanna á Gasa lauk. Enn ríkir þó mjög alvarlegt ástand meðal almennings á svæðinu. Óbreyttir borgarar sjá ekki fram á geta komið lífi sínu í eðlilegt horf að nýju og fyllast æ meiri örvæntingu.
Þetta kemur fram í
nýrri skýrslu sem Alþjóða Rauða krossinn (ICRC) sendi frá sér í dag um ástandið á Gasa. Þar kemur fram að
íbúar eiga æ erfiðara með að sjá fyrir sér. Um leið fá alvarlega veikir
sjúklingar ekki nauðsynlega læknisþjónustu. Skýrslan sýnir einnig að
þúsundir Gasabúa sem misstu heimili sín og eignir fyrir hálfu ári hafa
enn ekki fengið þak yfir höfuðið.
Hömlur á ferðafrelsi og flutningum auka neyð almennings
Samkvæmt skýrslunni eru takmarkanir á ferðafrelsi og vöruflutningum til
og frá Gasa ein af helstu ástæðunum fyrir þeirri neyð sem ríkir meðal
almennings. Erlendir stuðningsaðilar hafa lofað fjórum og hálfum
milljarði bandaríkjadala til enduruppbyggingar á svæðinu, en talið er
að það muni koma að litlu gagni meðan hömlur eru á innflutningi
byggingarefnis og annarra nauðsynlegra aðfanga.
Fram kemur að
nauðsynlegri samfélagsþjónustu á borð við vatnsveitur og
hreinlætisaðstöðu er mjög ábótavant. Gríðarlegu magni af óhreinsuðu
skólpi er veitt út í Miðjarðarhafið á degi hverjum. Sjúkrahús eiga
erfitt með að sinna sjúklingum vegna eftirlits og takmarkana á inn- og
útflutningi. Flóknar og tímafrekar reglur hægja á því að nauðsynlegar
lækningavörur á borð við verkjalyf og röntgenfilmur berist til
viðtakenda.
Einangrun Gasasvæðisins hefur leitt af sér mikið atvinnuleysi og
efnahagslegt hrun. „Sérstaklega fátækustu íbúarnir hafa þegar nýtt sér
til fulls allar tiltækar leiðir til að bjarga sér og hafa oft þegar
selt allar eigur sínar fyrir mat,“ sagði Antoine Grand, yfirmaður
sendinefndar Alþjóða Rauða krossins á svæðinu. „Versnandi lífskjör munu
hafa neikvæð áhrif á heilsu og velferð fólksins til lengri tíma. Verst
áhrif hefur ástandið á börnin, sem eru meira en helmingur af íbúum
Gasasvæðisins.“
Í skýrslunni fer Alþjóða Rauði krossinn fram á að hömlur á
fólksflutningum og vörum verði aflétt. „Ísrael hefur rétt til að vernda
íbúa sína gegn árásum“, sagði Grand. „En þýðir það að meira en ein og
hálf milljón manna á Gasa hafi ekki rétt á að lifa eðlilegu lífi?“
Nauðsynlegt að fella niður innflutningshömlur á tækjum og aðföngum til sjúkrahúsa
Skýrslan nefnir meðal annars að nauðsynlegt sé að fella niður
innflutningshömlur á lækningatækjum og byggingarefnum á borð við
sement og stál. Jafnframt er talið nauðsynlegt að fella niður hömlur á
útflutningi frá Gasa, að opna að nýju umferðarmiðstöðvar til að bæta
flutninga á fólki og vörum. Eitt af því mikilvægasta er að veita bændum
aðgang að þeim jörðum sem eru á öryggissvæðum við landamærin, og að
tryggja að nýju öruggan aðgang sjómanna að fjarlægari miðum.
Skýrsla Alþjóða Rauða krossins dregur þá ályktun að mannúðaraðstoð geti
ekki komið í staðinn fyrir trúverðugar aðgerðir á sviði stjórnmála ef
takast eigi að fullnægja mannúðarþörfum almennings á Gasasvæðinu.
Alþjóða Rauði krossinn hvetur ríkisstjórnir, áhrifamenn á sviði
stjórnmála og vopnaða hópa sem aðild eiga að málinu að gera það sem í
þeirra valdi stendur til að opna Gasasvæðið að nýju og standa vörð um
líf og virðingu almennings á svæðinu.
Starf Rauða kross Íslands á Gasa
Rauði kross Íslands kemur að hjálparstarfi í Palestínu með ýmsum hætti.
Frá árinu 2007 hefur Pálína Ásgeirsdóttir hjúkrunarfræðingur starfað
með Alþjóða Rauða krossinum á herteknu svæðunum og í Gasa. Pálína tók
við nýju starfi fyrr í þessum mánuði í Gasa þar sem hún mun stýra
sjúkrahúsþjónustu og uppbyggingu heilbrigðisverkefna Alþjóða Rauða
krossins. Þess má geta að Pálína er einn reyndasti sendifulltrúi Rauða
kross Íslands og var sæmd fálkaorðunni á þjóðhátíðardaginn 17. Júní
síðastliðinn fyrir alþjóðlegt hjálparstarf. Hartnær 25 ár eru síðan
Pálína hóf störf með Rauða krossinum.